Mannauður og þekking.
Starfsmannastefna Skattrannsóknarstjóra ríkisins
Skattrannsóknarstjóri ríkisins hefur þá stefnu að ráða til starfa sem hæfast starfsfólk, efla það í starfi og skapa traust og gott samstarf innan stofnunarinnar. Í því skyni að sem skýrastar reglur séu fyrirliggjandi um mál sem snerta starfsmenn stofnunarinnar og störf þeirra hefur embættinu verið sett stefna í starfsmannamálum.
I. Lög og kjarasamningsákvæði.
1. Ráðningaferli.
Skattrannsóknarstjóri ríkisins sækist eftir að ráða til starfa hæfa og metnaðarfulla einstaklinga sem eru tilbúnir til að takast á við krefjandi verkefni í síbreytilegu umhverfi. Allar stöður eru auglýstar með lögformlegum hætti, nema afleysingastörf. Embættið hefur það að leiðarljósi að ráða þá starfsmenn sem teljast best fallnir til þess að gegna þeim störfum sem um er að ræða hverju sinni. Í því sambandi metur embættið allar umsóknir hlutlægt og heildstætt eftir menntun, aldri, fyrri störfum, annarri reynslu og öðru sem máli er talið skipta. Reynsla af störfum við skatteftirlit og þekking á framkvæmd slíkra mála eru sjónarmið sem ætíð skipta máli við ráðningu starfsmanna. Fyrrverandi starfsmenn sem sýndu góða frammistöðu í fyrra starfi sínu hjá stofnuninni, ganga að öðru jöfnu fyrir um starf að nýju.
2. Starfskjör.
Þegar ekki er um að ræða tímabuna ráðningu er í ráðningarsamningi gert ráð fyrir reynslutíma til nokkurra mánaða. Notað er staðlað ráðningarsamningsform frá fjármálaráðuneytinu. Í ráðningarsamningi er kveðið á um vinnutíma, vinnustað, gildistíma, uppsagnartíma, tegund starfs, hvaða lífeyrissjóð starfsmaður greiðir til, stéttarfélag, hvort um tímabundna ráðningu er að ræða, launaflokk, fastar greiðslur ef einhverjar eru auk annarra staðlaðra samningsatriða.
3. Starfslýsingar.
Til staðar eru starfslýsingar fyrir öll störf innan stofnunarinnar. Starfslýsingar taka breytingum samhliða þróun starfa. Starfsmenn skulu koma með ábendingar ef starf þeirra hefur tekið breytingum frá starfslýsingu.
4. Þagnarskylda.
Starfsmönnum er skylt að vinna þagnareið og skulu halda í heiðri ákvæði laga um þagnarskyldu opinberra starfsmanna svo og ákvæði skattalaga um þagnarskyldu. Þagnarskyldan helst þótt starfsmaður láti af starfi. Sérstaklega skal haft í huga að eftir að starfsmaður lætur af starfi er brýnt að gætt sé að því að trúnaðarupplýsingar séu ekki opnar fyrir honum.
5. Jafnréttismál.
Ákvæði laga og reglugerða sem varða jafnréttismál er að sjálfsögðu fylgt. Í því felst m.a. að starfsmönnum er ekki mismunað eftir aldri, kynferði, þjóðerni, kynþætti, stjórnmálaskoðunum eða trúarskoðunum. Leitast skal við að jafna stöðu kynjanna á vinnustað og við starfsráðningar skal haft í huga ef um jafnhæfa umsækjendur er að ræða að ráða frekar það kynið sem er í minnihluta hjá stofnuninni. Stofnunin hefur útbúið jafnréttisáætlun og um jafnréttismál er vísað til hennar að öðru leyti.
6. Samskipti á vinnustað.
Starfsmönnum ber að sýna samstarfsfélögum virðingu og háttvísi í samskiptum. Einelti eða kynferðisleg áreitni er ekki liðin, í hvaða formi sem slík háttsemi kann að birtast. Starfsmönnum sem verða varir við annað hvort, ber að gera yfirmanni grein fyrir atvikum svo fljótt sem auðið er.
7. Umgengni á vinnustað.
Til þess er ætlast að starfsmenn séu snyrtilegir til fara við vinnu sína og klæðist viðeigandi fatnaði hverju sinni. Umgengni um húsnæði, búnað og verkfæri stofnunarinnar á að vera þannig að hvorki verði tjón af né hlutir skemmdir. Almenn snyrtimennska er talin sjálfsögð og eðlileg í umgengni og framkomu.
8. Nýr starfsmaður.
Við upphaf starfs þarf að gæta að því að það er öllum einstaklingum erfitt að mæta í fyrsta sinn á nýjan vinnustað. Mikilvægt er því að vel sé tekið á móti viðkomandi. Hann skal kynntur fyrir hverjum og einum starfsmanni stofnunarinnar, honum fengið kynningarefni um embættið og störf þess á fyrsta degi og síðan létt verkefni fljótlega. Á fyrsta starfsdegi skulu honum kynntar reglur um notkun eldhúss og annars sameiginlegs rými á vinnustað, reglur um notkun tækja, bifreiða, ljósritunarvéla, síma, prentara og annars tölvubúnaðar. Þá skulu honum kynnt ákvæði laga um þagnarskyldu og brýnd trúmennska, heiðarleiki og vönduð en jafnframt hröð vinnubrögð. Hann skal fá lykil sem gengur að vinnustaðnum og jafnframt að skrifstofu hans, fá öryggiskvóta vegna öryggiskerfis. Honum skal komið fyrir á vinnustöð sem búin skal þægilegum búnaði sem viðurkennd er sem góð frá heilbrigðissjónarmiði. Æskilegt er að tilnefndur sé sérstakur starfsmaður sem ætlað er að vera leiðbeinandi hans fyrstu dagana í starfi.
9. Mætingar, viðvera og netnotkun.
Flestir starfsmenn eiga kost á sveigjanlegum vinnutíma. Þó á það ekki við um alla starfsmenn, m.a. þá sem sinna símvörslu og móttöku viðskiptamanna. Í sveigjanlegum vinnutíma felst m.a. að starfsmaður skal skila annað hvort ákveðinni viðveru á vinnustað eða ákveðnum verkefnum. Hugsanlega getur komið til greina að starfsmaður vinni hluta starfs heiman frá sér eftir nánara samkomulagi við yfirmann.
Annar sveigjanleiki er takmarkaður, t.a.m. geta starfsmenn ekki vænst þess að þeir geti farið í hlutastarf. Ætlast er til að starfsmenn stilli töfum á vinnu vegna einkaerinda í hóf, m.a. brottfarir af vinnustað og nota frekar til þess möguleika sveigjanlegs vinnutíma.
Viðvera á vinnustað er skráð samkv. stimpilklukku enda þótt að starfsmaður kunni að vera á föstum launum óháð viðveru. Tilkynna og skrá skal niður brottför af vinnustað utan matartíma.
Allir starfsmenn hafa aðgang að símum, veraldarvefnum og tölvupósti. Notkun þessa í einkaþágu skal vera í lágmarki. Sérstaklega skal varast að senda einkaerindi undir tölvupóstfangi sem starfsmaður fær vegna starfs síns og er auðkennt stofnuninni. Ítrekaðar frátafir geta kallað á áminningu og/eða brottvikningu úr starfi.
10. Framkoma við viðskiptavini.
Allir starfsmenn skattrannsóknarstjóra ríkisins skulu í hvívetna sýna kurteisi í öllum samskiptum við rannsóknarþola og viðskiptavini og virða skoðanir þeirra. Starfsmenn embættisins þurfa að gæta að þeirri ábyrgð og ímynd sem þeir kunna að skapa með framkomu sinni gagnvart rannsóknarþolum og á það við um samskipti hvort sem er á vinnustað eða utan hans. Hvatvísleg svör eru ekki viðeigandi og leiða skal hjá sér allar deilur við skattaðila, lögmenn þeirra og tilnefnda verjendur eftir því sem tök eru á. Við formlegar skýrslutökur eiga að öðru leyti við ákvæði reglugerðar nr. 373/2001 auk meginreglna laga um meðferð opinberra mála nr. 19/1991.
11. Fræðslumál, símenntun og þekking.
Lögð er áhersla á að starfsmenn stofnunarinnar eigi kost á fræðslu og öflun þekkingar til hagsbóta fyrir störf hjá stofnuninni. Á hverjum starfsmanni hvílir sú ábyrgð að sækja sér þekkingu og fræðslu eftir því sem við á hverju sinni með það að leiðarljósi að starfi viðkomandi sé sinnt af fagmennsku og með sem hagkvæmustum hætti.
12. Starfsmannaviðtöl.
Á árinu 2004 voru tekin upp formleg starfsmannaviðtöl og fara þau fram eigi sjaldnar en einu sinni á ári. Tilgangur starfsmannaviðtala er að ræða starfsmannatengd mál á opinn og hreinskilinn hátt og að fylgja eftir stefnu og markmiðum stofnunarinnar. Jafnframt skulu yfirmaður og hlutaðeigandi starfsmaður fara yfir frammistöðu hvors annars og meta hvort unnt sé að bæta framkomu, starfsárangur ásamt persónutengdum markmiðum starfsmanns. Starfsmannasamtöl skulu fara fram eftir fyrirfram skilgreindu ferli.
13. Orlofstaka, veikindi og leyfi.
Starfsmenn skulu á fyrsta ársfjórðungi skila til yfirmanns óskum sínum um orlofsdaga sem þeir æskja að taka á komandi orlofstímabili. Ekki er sjálfgefið að unnt sé að uppfylla allar óskir þar að lútandi þótt slíkt sé ávallt reynt. Ef starfsmenn þurfa að taka orlof utan lögbundins sumarorlofstíma skulu þeir láta vita af óskum sínum hæfilega löngu áður þannig að tryggt sé að starfsemi stofnunarinnar raskist ekki vegna þessa. Orlof utan orlofstíma er háð samþykki yfirmanns.
Veikindi skal tilkynna samdægurs, annað hvort yfirmanni eða skrifstofumanni í móttöku. Láta skal vita amk. annan hvorn dag, hvort um áframhaldandi fjarvist sé að ræða. Að jafnaði þarf ekki að skila læknisvottorði nema veikindi séu langvarandi.
Við sérstakar aðstæður svo sem vegna fráfalls náins ástvinar getur starfsmaður fengið leyfi frá störfum í fáeina daga án skerðingar á launum skv. samkomulagi við yfirmann.
Starfsmenn eru hvattir til að efla eigin vellíðan sem og samstarfsmanna sinna m.a. með því að leggja rækt við að efla eigin heilsu með ástundun líkamsræktar. Embættið styrkir starfsmenn við ástundun líkamsræktar.
14. Ferðir á vegum vinnuveitenda.
Ferðir innanlands og erlendis skulu aðeins farnar eftir samþykki viðkomandi yfirmanns. Stilla skal ferðum í hóf eftir því sem tök eru á og leita hagkvæmustu leiða til að lágmarka ferðakostnað. Við ferðalög innanlands skal leitast við að nota bifreiðar stofnunarinnar eftir því sem tök eru á.
15. Starfslok.
Þegar að starfslokum kemur, hvort sem það er vegna ráðningar starfsmanns í annað starf hjá öðrum vinnuveitanda eða af öðrum ástæðum, er mikilvægt að vandað sé til yfirtöku annarra starfsmanna á starfssviði og verkefnum þess starfsmanns sem lætur af störfum. Til að slíkt megi takast er mikilvægt að fyrir hendi sé nákvæm lýsing á öllum störfum þar sem fram komi helstu ferlar og einkenni starfsins.
Við starfslok skal leitast við að fram fari starfslokaviðtal þar sem m.a. skal farið yfir hvers vegna viðkomandi lætur af störfum. Þá skal það áréttað að þagnarskylda haldist.
16. Reykingar.
Skattrannsóknarstjóri ríkisins er reyklaus vinnustaður. Reykingar á skrifstofum stofnunarinnar eru með öllu óheimilar.
14.02.2002
01.04.2003
03.04.2003
30.11.2004
25.08.2006.
SEÞ