Fjármálaráðuneytið og skattrannsóknarstjóri ríkisins

gera með sér svohljóðandi samning

I. Tilgangur

Í samningi þessum er kveðið á um skyldur fjármálaráðuneytisins og embættis skattrannsóknarstjóra ríkisins við útfærslu á lögbundnu hlutverki embættisins ásamt því að leggja grunn að áætlanagerð og mati á árangri af starfsemi þess. Með áætlunum sem samningurinn kveður á um er mótuð stefna til næstu ára. Sýna skal fram á árangur af starfseminni í ársskýrslu með samanburði við markmið ársins.

Tilgangur samningsins er að afmarka starfssvið og rekstur embættis skattrannsóknarstjóra ríkisins í samræmi við lög og reglugerðir sem um starfsemina gilda og þau verkefni sem ráðuneytið felur embættinu og í takt við stefnu og áherslur fjármálaráðuneytisins.

Samningurinn breytir engu um ábyrgð ráðherra gagnvart Alþingi á rekstri embættisins né þeim stjórnsýsluskyldum sem ráðherra og embættið hafa lögum samkvæmt.

II. Hlutverk

Meginhlutverk skattrannsóknarstjóra ríkisins er rannsókn á ætluðum skattundandrætti og öðrum skattalagabrotum. Ennfremur rannsakar embættið ætluð brot á lögum um ársreikninga og bókhald. Skattrannsóknarstjóri ríkisins fer með viðeigandi stjórnsýslu eftir því sem lög og reglugerðir mæla fyrir um.

III. Verkefni

Aðalviðfangsefni embættisins greinast í eftirfarandi þætti:

1. Skattrannsóknir til að skapa viðhlýtandi grundvöll fyrir endurálagningu opinberra gjalda og tilhlýðilega refsimeðferð.

2. Rannsóknir á ætluðum brotum á lögum um bókhald og ársreikninga.

3. Kröfugerð í skattsektarmálum fyrir yfirskattanefnd.

4. Undirbúningur refsimeðferðar með vísun máls til lögreglu.

5. Önnur verkefni samkvæmt fyrirmælum laga og reglugerða og verkefni sem ráðuneytið felur embættinu að inna af hendi.

IV. Markmið og áherslur

Skattrannsóknarstjóri ríkisins skal í áætlunum sínum setja fram skýr markmið og leiðir að þeim ásamt því hvernig árangur skuli metinn.

Í áætlunum sínum skal embættið leggja áherslu á:

· að leitast við að koma í veg fyrir skattsvik, upplýsa skattalagabrot og beita þá viðurlögum sem uppvísir verða að brotum;

· að sýna frumkvæði að því er varðar rannsóknir og aðgerðir gegn hvers kyns skattsvikum og koma með ábendingar til annarra skattyfirvalda um einstök atriði varðandi skattframkvæmd;

· að fylgjast með þróun skattrannsókna erlendis og nýjungum í starfsaðferðum;

· að velja reglulega tilteknar atvinnugreinar sem sæti sérstakri skattrannsókn;

· að bæta afköst og árangur í viðurlagameðferð í upplýstum málum um vangoldinn skatt;

· að kanna með rannsóknum og upplýsingasöfnun hvort unnt sé að meta svið og umfang skattsvika, aðferðir við undanskot, hverjir fremji brotin og við hvaða aðstæður, m.a. í þeim tilgangi að styrkja starf embættisins;

· að rekstur embættisins sé sem hagkvæmastur og innan fjárheimilda;

· að starfsfólk sé vel upplýst um verkefni sín, réttindi og skyldur. Fylgt verði eftir stefnu á sviði starfsmannamála þar sem kveðið er á um endurmenntun, þjálfun starfsmanna og jafnréttismál;

V. Skyldur og ábyrgð samningsaðila

Á samningstímanum skulu skattrannsóknarstjóri ríkisins og fjármála-ráðuneytið standa skil á verkefnum sem hér segir:

Skattrannsóknarstjóri ríkisins skal:

Fyrir 1. desember 2004 leggja fram drög að áætlun til næstu fimm ára um helstu verkefni og áherslur á tímabilinu 2005-2010. Áætlun þessi skal höfð að leiðarljósi við gerð ársáætlunar.

Í desember ár hvert skila ráðuneytinu ársáætlun fyrir næsta ár. Í janúarmánuði ár hvert skal embættið skila endurskoðaðri ársáætlun, þ.m.t. áætlun um tiltekin verkefni á grundvelli langtímaáætlunar.

Í maímánuði ár hvert í ársskýrslu til ráðuneytisins gera grein fyrir árangri af starfi embættisins undanfarið ár með samanburði við þau markmið sem birt eru í ársáætluninni.

Fjármálaráðuneytið skal:

Leiðbeina embættinu um forsendur vegna stefnumörkunar og vekja athygli þess á laga- og reglugerðarbreytingum er varða rekstur þess.

Taka innan 30 daga afstöðu til þeirra áhersluatriða sem koma fram í áætlunum og ársskýrslu embættisins og koma sjónarmiðum sínum á framfæri við skattrannsóknarstjóra.

VI. Gildistími og endurskoðun

Samningurinn gildir frá undirritun. Gildistími er fimm ár en hvor aðili um sig getur óskað eftir endurskoðun innan þess tíma. Vinna við endurnýjun samningsins skal hefjast a.m.k. þremur mánuðum áður en samningstímanum lýkur.

Reykjavík, 26. maí 2004

___________________ ___________________________

Fjármálaráðherra Skattrannsóknarstjóri ríkisins