Jafnréttisáætlun
Skattrannsóknarstjóra ríkisins
1. Stefna
Stefna
skattrannsóknarstjóra ríkisins er að gætt skuli fyllsta jafnréttis milli kvenna
og karla og að hver starfsmaður verði metinn á eigin forsendum. Þannig verði
tryggt að mannauður stofnunarinnar nýtist sem best. Kynbundin mismunun er
óheimil, í hvaða formi sem hún birtist og er það stefna stofnunarinnar að
útrýma slíkri mismunun komi hún í ljós.
2. Markmið
Markmið
jafnréttisáætlunar er að stuðla að jafnri stöðu kvenna og karla hjá skattrannsóknarstjóra
ríkisins og jöfnum tækifærum einstaklinga á sem flestum sviðum, óháð kynferði.
Þetta á m.a. við um rétt til starfa, aðstöðu, menntunar og kjara fyrir jafn
verðmæt og sambærileg störf.
3. Leiðir að markmiðum
· Gæta skal
jafnréttis við ráðningar og tilfærslur í starfi.
· Gæta skal
jafnréttis hvað varðar ábyrgð og þátttöku starfsmanna í starfshópum og nefndum.
· Greiða skal jöfn
laun og sömu kjör fyrir jafnverðmæt og sambærileg störf.
· Konur og karlar
skulu eiga jafnan aðgang að starfsmenntun og þjálfun.
· Gera skal
starfsmönnum kleift að samræma atvinnu og fjölskyldulíf.
· Kynferðisleg áreitni
eigi sér ekki stað.
4. Ábyrgð
Ábyrgð á framgangi
jafnréttismála er hjá skattrannsóknarstjóra, forstöðumönnum, verkefnisstjórum
og yfirlögfræðingi. Skattrannsóknarstjóri skal vinna að því að jafnréttisáætlun
sé framfylgt og viðhaldið og leggja mat á hvort markmiðum hennar sé náð með
aðstoð annarra yfirmanna embættisins sem áður eru taldir. Skattrannsóknarstjóri
er einnig ráðgjafi starfsmanna og yfirstjórnar í jafnréttismálum og fulltrúi
embættisins út á við í þeim málaflokki. Stjórnendum og starfsmönnum embættisins
skal standa til boða fræðsla og aðstoð í jafnréttismálum ef talin er þörf á
slíku. Þetta á við störf, starfsaðstæður, kjör, samskipti á vinnustað og önnur
þau mál sem lúta að jafnrétti og samskiptum kynjanna á vinnustað.
5. Jafnréttisnefnd
Jafnréttisnefnd skal
skipuð og funda reglulega. Hún starfar á grundvelli 13. greinar laga nr.
96/2000 um jafna stöðu og jafnan rétt kvenna og karla. Hlutverk hennar er að
fylgja markmiðum embættisins í jafnréttismálum eftir og vera ráðgefandi fyrir
stjórnendur og starfsmenn. Nefndin skal vinna að þeim verkefnum sem tiltekin
eru í áætluninni og henni falin. Skattrannsóknarstjóri hefur skipað nefndina
til næstu tveggja ára. Nefndin skal vera honum til aðstoðar í jafnréttismálum. Í
nefndinni sitja Ómar I. Bragason, rannsóknarmaður og Guðný Bjarnarsdóttir verkefnisstjóri. Eigi sjaldnar en einu
sinni á ári skal nefndin kynna skattrannsóknarstjóra stöðu jafnréttismála og
hvort úrbóta kunni að vera þörf.
6. Sérstakar aðgerðir
6.1 Auglýsingar og ráðningar
Farið skal samkvæmt
fyrirmælum í lögum og frá Fjármálaráðuneyti um auglýsingu á lausum störfum. Ef
tveir jafnhæfir einstaklingar sækja um auglýsta stöðu, skal sá af því kyni sem
er í minnihluta í slíkum störfum hjá skattrannsóknarstjóra ríkisins, að öðru
jöfnu ganga fyrir við ráðningu. Samkvæmt 22. gr. laga nr 96/2000 þá "teljast
aðgerðir til að auka möguleika kvenna eða karla sérstaklega til að koma á
jafnrétti og jafnri stöðu kynjanna ekki ganga gegn lögum þessum. Sama á við ef
nauðsynlegt telst að ráða annað kynið vegna hlutlægra þátta er tengjast
starfinu".
Ekki skal auglýsa eða
birta auglýsingu um laust starf þar sem gefið er í skyn að fremur sé óskað
starfsmanns af öðru kyninu en hinu nema ef gild rök mæla með því að einungis sé
auglýst eftir öðru kyninu.
6.2 Starfsaðstæður
Starfsfólk skal eiga
kost á sveigjanlegum vinnutíma eða annarri hagræðingu þar sem því verður við komið,
til að auðvelda því að samræma starf og einkalíf. Ekki er þó starfsmanni unnt
að fara úr aðalstarfi í hlutastarf nema sérstaklega standi á og þá aðeins með
samþykki skattrannsóknarstjóra. Tekið skal tillit til mismunandi aðstæðna svo
sem umönnunar barna eða annarra fjölskyldumeðlima í samræmi við ákvæði
kjarasamninga og rúmlega það eftir því sem aðstæður krefjast. Allir starfsmenn
hafi góða vinnuaðstöðu, skrifborð í eðlilegri hæð, viðurkenndan skrifborðsstól
og aðgang að nettengdri tölvu á vinnustað. Þá skal annar aðbúnaður vera
eðlilegur og í samræmi það sem tíðkanlegt má teljast.
6.3 Kjör
Við ákvörðun launa og
fríðinda skal þess gætt að kynjum sé ekki mismunað. Gæta skal þess að konur og
karlar njóti að öllu leyti sambærilegra kjara og sambærilegra starfsaðstæðna.
6.4 Starfsþróun / Starfsframi
Konur og karlar skulu
njóta sömu möguleika til endurmenntunar, starfsþjálfunar og til að sækja
námskeið. Við úthlutun ábyrgðar og verkefna og skipan í nefndir og stjórnir á
vegum skattrannsóknarstjóra ríkisins skal eftir því sem við verður komið,
leitast við að hlutfall kynjanna sé sem jafnast.
6.5 Samskipti á vinnustað
Allir starfsmenn
embættisins skulu umgangast hvern annan af virðingu og kurteisi. Rifrildi milli
starfsmanna eru óheimil. Einelti starfsmanna gagnvart öðrum starfsmönnum er
ekki liðið. Kynferðisleg áreitni er óheimil og starfsmenn sem verða fyrir
slíkri framkomu hafa rétt til þess að kæra viðkomandi háttsemi. Fulltrúar í
jafnréttisnefnd embættisins aðstoða viðkomandi við að beina málinu í réttan
farveg þurfi að koma til slíks.
7. Kynning og endurskoðun jafnréttisáætlunar
Jafnréttisáætlun
þessa skal endurskoða í síðasta lagi fyrir árslok 2007. Umsjón með endurskoðun
skal vera í höndum nefndar stofnunarinnar um jafnréttismál og taki m.a. tillit
til annarra kannana sem gerðar hafa verið um sömu mál.
Gert í Reykjavík í
janúar 2002,
endurskoðað í nóvember 2004.
Endurskoðað 1. maí 2007.
skattrannsóknarstjóri