Fréttir

22.10.2009
Starfshópur til að rannsaka hugsanleg brot gegn skattalögum
Í dag 15. október 2009 tók til starfa starfshópur skattyfirvalda sem ætlað er að rannsaka hugsanleg brot á skattalögum í tengslum við hrun bankanna; hjá eigendum, stjórnendum, starfsmönnum og félögum þeim tengdum. Tilurð átaksins má rekja til fréttatilkynningar nr. 24/2009, sem gefin var út af fjármálaráðuneytinu. Í þeirri tilkynningu kemur m.a. fram að í viðræðum fjármálaráðuneytisins við skattrannsóknarstjóra og ríkisskattstjóra hafi komið fram að afar brýnt sé að hraða rannsókn hugsanlegra skattalagabrota í tengslum við fall bankanna og í starfsemi þeirra í aðdraganda þess, hvort sem er hjá eigendum, stjórnendum eða starfsmönnum og félaga sem þeim tengjast. Sé æskilegt að aukinn þungi verði lagður í þetta verkefni hjá stofnunum skattyfirvalda og í því skyni verði skipaður starfshópur sérfræðinga stofnana skattyfirvalda til að vinna sérstaklega að þessum verkefnum.

Starfshópinn skipa nú átta sérfræðingar; þrír frá skattrannsóknarstjóra ríkisins, tveir frá ríkisskattstjóra, tveir frá skattstjóranum í Reykjavík og einn frá skattstjóranum í Reykjanesi. Starfshópurinn starfar innan embættis skattrannsóknarstjóra ríkisins og er gert ráð fyrir að starfstími hópsins verði sex mánuðir.

Ábendingum er hægt að koma til starfshópsins í síma 550 8800, eða á netfangið starfshopur@skattur.is

<< til baka